Վանաձորի Շառլ Ազնավուրի անվան զբոսայգին հիմնանորոգվել է 2020 թվականին՝ սուբվենցիոն ծրագրի շրջանակում, շահագործման հանձնվել 2020 թվականի դեկտեմբերին: Այգու հիմնանորգման ծրագրում մասնավոր ներդրում չի եղել:

Ըստ Վանաձորի համայնքապետարանի կարիքների համար Վանաձոր համայնքի Շառլ Ազնավուրի անվան զբոսայգու սմարթ կառուցվածքների ձեռքբերման և տեղադրման աշխատանքների կատարման գնման պայմանագրի, այգու սմարթ կառուցվածքներն են՝ սմարթ նստարանները, շախմատի քարերով հարթակը և երաժշտական գունային համակարգը՝ 8 բարձրախոսով, իսկ ըստ Վանաձորի համայնքապետարանի՝ այգու սմարթ կառուցվածքները սմարթ նստարաններն են: Ըստ այս պայմանագրի՝ այգու սմարթ կառուցվածքների ձեռքբերման և տեղադրման արժեքը կազմել է 10․5 միլիոն դրամ:

Վանաձոր համայնքի ղեկավար Մամիկոն Ասլանյանը մեր հարցմանն ի պատասխան տեղեկացնում է, որ այգու համար նախատեսված է 6 սմարթ նստարաններ տեղադրել, որոնք ամբողջությամբ կատարվել է, որից հետո 2 սմարթ նստարաններ տեղափոխվել են Վանաձորի Կառլոս Աբովյանի անվան պատկերասրահի դիմացի պուրակ։

Սակայն մեր դիտարկման արդյունքում պարզվել է, որ Վանաձորի Շառլ Ազնավուրի անվան զբոսայգում փաստացի տեղադրված են 2 սմարթ նստարաններ, որոնցից աշխատում է միայն մեկը, ունի լիցքավորման հնարավորություն։ Պարզեցինք նաև, որ Կառլոս Աբովյանի անվան պատկերասրահի դիմացի պուրակ տեղափոխվել է ոչ թե 2 այլ 1 սմարթ նստարան, իսկ թե որտեղ են, կամ առկա են, թե ոչ մնացած 3 սմարթ նստարանները, Վանաձորի համայնքապետարանից չեն շտապում պատասխանել։ Այդ մասին մեր գրավոր հարցման համար, ըստ քաղաքապետարանի, իրենց լրացուցիչ ժամանակ է անհրաժեշտ։

Զբոսայգում սմարթ կառուցվածքներից տեղադրված չէ նաև շախմատի քարերով հարթակը, մինչդեռ պայմանագրի կամ դրա մի մասի կատարման արդյունքների հանձնման-ընդունման ակտի համաձայն «Մ. ԱՌՏ» ՍՊԸ-ն կատարել է աշխատանքները, այդ թվում նաև սմարթ կառուցվածքների ձեռքբերման և տեղադրման աշխատանքները։ Վանաձորի քաղաքապետարանը կրկին պատասխանել է, որ այդ հարցի պատասխանի համար ևս իրենց լրացուցիչ ժամանակ է հարկավոր։ Ներկայումս այգում անխնամ են նաև սիզամարգերը: Վանաձոր համայնքի ղեկավար Մամիկոն Ասլանյանի մեզ ուղղված հարցման պատասխանում նշված է, որ Վանաձորի Շառլ Ազնավուրի անվան զբոսայգու հիմնանորոգման ծրագրի ընդհանուր կապիտալ ծախսերը կազմել են 150 մլն դրամ:

Մեր հարցումից 30 օր անց Վանաձորի համայնքապետարանը պարզաբանում է տրամադրել։ Ըստ այդմ, Վանաձորի համայնքապետարանը ձեռք է բերել 6 սմարթ նստարան, որոնցից 2-ը տեղադրված են Վանաձորի Շառլ Ազնավուրի այգում, 1-ը Վանաձորի կերպարվեստի դիմացի պուրակում, 2 նստարան տեղադրված է Արցախ պուրակում, 1-ը՝ Հայքի հրապարակում: Մեր դիտարկման արդյունքում ևս հաստատվել է վերոնշյալը:

Շախմատի քարերով հարթակը հանձնվել է «Վանաձորի շախմատի մասնագիտացված մանկապատանեկան մարզադպրոց» ՀՈԱԿ-ի պահպանությանը: Պահպանության և անվտանգության նկատառումներից ելնելով՝ այն շենքից դուրս է բերվում աշխատանքային ժամերին՝ ապա ներս է բերվում:

«Վանաձորի Շառլ Ազնավուրի անվան այգին կառուցվել է ըստ նախագծի, բոլոր ստանդարտների պահպանմամբ: Այնտեղ առկա են նախագծով հաստատված բոլոր ենթակառուցվածքները», -նշված է Վանաձորի քաղաքապետ Մամիկոն Ասլանյանի տրամադրած պատասխանում։