Լոռու մարզի դատարանի դատավոր Մուշեղ Հարությունյանը Վանաձորում առանձնատուն ունի։ Փորձեցինք պարզել՝ դատավորի աշխատավարձով հնարավո՞ր է առանձնատան սեփականատեր դառնալ։

Մինչ առանձնատան ձեռքբերման գործարքին անդրադառնալը նշենք, որ Մուշեղ Հարությունյանը 1991 թ-ից դատական համակարգում տարբեր պաշտոններ է զբաղեցրել։ Այդ ընթացքում 2 տարի դատախազությունում է աշխատել։ Վերջին երեք տարում էլ Լոռու մարզի առաջին ատյանի ընդհանուր իրավասության դատարանի նախագահն էր, այժմ նույն դատարանում պարզապես դատավոր է։ Դատավորի կինը՝ Արմինե Աբաջյանը, պետական պաշտոններ չի զբաղեցրել։
Կառուպցիայի կանխարգելման հանձնաժողովում առկա են դատավորի և կնոջ ունեցվածքի, եկամուտների հայտարարագրերը։ Ուսումնասիրելով 2011–2020 թվականների հայտարարագրերը պարզեցինք, որ դատավորը Վանաձորից բացի անշարժ գույք ունի նաև Երևանում։ Մուշեղ Հարությունյանը 2020 թ-ի դրությամբ Վանաձորում ունի 1 առանձնատուն, 1 ավտոտնակ (միանձնյա), 1 հասարակական շինություն, իսկ Երևանի Արաբկիր վարչական շրջանում՝ 1 բնակարան, 1 ավտոկայանատեղի։ Բացառությամբ ավտոտնակի, մյուս բոլոր գույքերը համատեղ սեփականություն են։

Դատավորի կնոջ՝ Արմինե Աբաջյանի 2020 թ-ի հայտարարագրի համաձայն, նա համատեղ սեփականության իրավունքով Վանաձորում ունի 1 առանձնատուն, 1 հասարակական շինություն, իսկ Երևանի Արաբկիր վարչական շրջանում՝ 2 բնակարան, 2 ավտոկայանատեղի։

Եթե ամբողջացնելու լինենք, ապա դատավորն ու կինը ընդահանուր առմամբ ունեն Երևանում 2 բնակարան, 2 ավտոկայանատեղի, իսկ Վանաձորում՝ 1 առանձնատուն, 1 ավտոտնակ, 1 հասարակական շինություն։

Ինչպե՞ս են ձեռք բերվել Վանաձորի առանձնատունը եւ ի՞նչ միջոցներով

Կադաստրի կամիտեում առկա փաստաթղթերի ուսումնասիրությամբ պարզեցինք, որ Վանաձոր քաղաքի Վարդանանց փողոցի 2-րդ նրբանցքում գտնվող առանձնատունը 1998 թ-ին պատկանել է քաղաքացի Արեգնազան Գաբոյանին։ Նույն տարում Գաբոյանն այն նվիրել է դատավոր Մուշեղ Հարությունյանի կնոջը՝ Արմինե Աբաջյանին։ 2007 թ-ին Արմինե Աբաջյանը նույն տարածքում Վանաձոր համայնքին պատկանած 57 քմ հողակտոր է գնել։ Արմինե Աբաջյանը շինթույլտվություն է ստացել և 2016-2017 թվականներին տեղում նոր առանձնատուն կառուցել, որը 2017 համատեղ սեփականության իրավունքով գրանցվել է իր և ամուսնու անունով։

Առանձնատան շուկայական արժեքը գնահավում է 49 միլիոն դրամ․ դոլարի վերածելու դեպքում այն կկազմի 102 հազար ԱՄՆ դոլար(03.11.2021 թ. փոխարժեքով)։

Ոշագրավ է, որ առանձնատան տեղում գտնված տունը դատավորի կնոջը նվիրած Արեգնազան Գաբոյանը աշխատում է Լոռու մարզի դատարանում։ Բարձրագույն դատական խորհրդից ստացված տեղեկատվության համաձայն, Արեգնազան Գաբոյանը 1999 թվականից է դատարանում աշխատում։
«Ի պատասխան ԲԴԽ-ին ուղղված Ձեր հարցման՝ տեղեկացնում ենք, որ Լոռու մարզի առաջին ատյանի ընդհանուր իրավասության դատարանի Վանաձորի նստավայրում է աշխատում տիկին Արեգնազան Գաբոյանը։ Նա զբաղեցնում է գրասենյակի առաջին կարգի մասնագետի պաշտոնը: Գաբոյանն աշխատում է 1999 թվանակից՝ որոշակի ընդհատումներով»,- մեր հարցմանն ի պատասխան հայտնել է ԲԴԽ նախագահի պաշտոնակատար Գագիկ Ջհանգիրյանի մամուլի խոսնակ Լիլիթ Շաբոյանը։

Առանձնատան կառուցման ժամանակ(2016-2017թթ) 102 հազար ԱՄՆ դոլարի ծախս կատարելու մասին որևէ տեղեկատվություն առկա չէ դատավորի և կնոջ հայտարարագրերում։ Առանձնատան կառուցման ժամանակ՝ 2016 թ-ին Մուշեղ Հարությունյանն ունեցել է 39 միլիոն դրամ, որը մեկ տարի անց դարձել է 10 միլիոն դրամ։ 29 միլիոն դրամի ճակատագիրն անհայտ է։ Թեև 2017 թ-ին դատավորը 34 միլիոն դրամ վարկ է վերցրել, սակայն վարկ վերցնելուց 3 տարի անց Երևանում բնակարան է գնել կառուցապատող «Միկշին» ընկերությունից։ Այսինքն վարկը բնակարանի գնման նպատակով է վերցրել։ 2017 թ-ին դատավորի կինը 10 հազար դոլար գումար փոխառություն է տվել (կարող է լինել ավանդի տեսքով)։

Վերը նկարագրված գործարքների լույսի ներքո դիտարկելիս կրկին անհայտ է, թե ինչ միջոցներով են դատավորն ու կինը կառուցել 102 հազար դոլոր շուկայական արժեքն ունեցող առանձնատունը։ Էլ առավել հետաքրքիր է, թե ինչ միջոցներով է Լոռու մարզի դատարանի Վանաձորի նստավայրի առաջին կարգի մասնագետը առանձնատուն գնել և ինչու է այն մեկ տարի անց նվիրել դատավորի կնոջը։ Այս հարցերին պատասխանները իրավապահները կարող են գտնել։