Շիրակի մարզի որոշ համայնքների կայքեր երբեմն ժամերով, երբեմն էլ օրերով անհասանելի են, հատկապես՝ ոչ աշխատանքային օրերին։ Որոշեցինք՝ մշտադիտարկում անել՝ հասկանալու համար, թե արդյո՞ք կայքերի խափանումների ինչ-որ օրինաչափություն կա։

Մշտադիտարկման համար ընտրեցինք Շիրակի մարզի մի քանի չխոշորացված համայնք՝ Գյումրին, Ազատանը, Աշոցքը, Արթիկը, Ախուրյանը, Պեմզաշենը, Փանիկը։ 10 օր՝ հուլիսի 15-ից մինչև 24-ը ներառյալ, 10։00-ից մինչև 22։00-ն դիտարկեցինք կայքերի աշխատանքը՝ մուտք գործելով յուրաքանչյուր երկու ժամը մեկ։

Թերևս միայն Գյումրիի և Աշոցքի համայնքային կայքերն էին, որ մշտադիտարկման ժամերին հասանելի էին։ Ազատանի կայքը խափանված էր հուլիսի 16-ին, Արթիկի կայքը, մշտադիտարկման տարբեր օրերի հանրագումարով, անհասանելի էր 7 ժամ, Ախուրյանի կայքը՝ 8 ժամ, Պեմզաշենինն ու Փանիկինը՝ 2-ական ժամ։ Մշտադիտարկման ավարտից շատ հետո էլ պարզվեց, որ Արթիկի ու Ազատանի կայքերը հաճախ չեն աշխատում։

Տեղական ինքնակառավարման մասին ՀՀ օրենքի 11-րդ հոդվածը սահմանում է, որ 3000 և ավելի բնակիչ ունեցող համայնքը պետք է ունենա պաշտոնական համայնքային կայք, որի ստեղծումն ու վարումը ապահովում է համայնքի ղեկավարը՝ ավագանու սահմանած կարգով։ Ավելին, օրենքը սահմանում է նաև, թե համայնքի գործունեության վերաբերյալ հատկապես ո՞ր տեղեկությունները պետք է կայքում հասանելի լինեն, այն էլ՝ ներբեռնելու հնարավորությամբ։ Ինչպես պարզեցինք, Շիրակի մարզի համայնքային շատ կայքերից անհնար է գտնել փնտրվող տեղեկությունը՝ ոչ միայն խափանումների պատճառով, այլ նաև տեղեկատվության բացակայության։ Բավական չէ, որ խախտվում է բնակիչների տեղեկություն ստանալու իրավունքը, անիմաստ են դառնում նաև այն ռեսուրսները, որոնք ծախսվել ու ծախսվում են համայնքների առանց այն էլ սուղ բյուջեներից՝ կայքի սպասարկման համար։

Համայնքային կայքերի «բոցերը»

Ոչ պակաս ուշագրավ է նաև կայքերի բաժինների բովանդակությունը։ Դրանք երբեմն ուղղակի զվարճալի են։ Օրինակ, Հայկավան համայնքի կայքում, հենց առաջին էջում տեղադրված էր 2021 թ․-ի նոյեմբերի 11-ի հայտարարություն (ստուգումներն անցկացվել են 2021թ․ օգոստոսին):

Սարապատ համայնքի օրացույցը վազանց է կատարել՝ մոտ մեկ տարով։ Այստեղ տեղադրված հայտարարությունը վերաբերում է 2022 թվականի մայիսի 3-ին։

Պետք է արձանագրել, որ կայքերում նաև համայնքների ղեկավարների մասին ինֆորմացիան լիարժեք չէ: Օրինակ, Առափիի համայնքային կայքում նշված են միայն համայնքապետի անուն- ազգանունն ու լիազորությունների սկիզբը, ուրիշ` ոչինչ: Նույն խնդիրը նաև Փանիկի և Արթիկի կայքում էր։ Պեմզաշենի կայքում համայնքի նախկին ղեկավարի մասին տվյալները թերի էին, իսկ նոր համայնքապետի մասին ընդհանրապես տեղեկություն չկար։

Գյումրիի կայքում էլ ահա այսպիսի թերություններ կան։

Աշոցքի համայնքային կայքը նկատելի առավելություններ ունի՝ ոչ միայն հասանելի է, այլ նաև պարբերաբար թարմացվում է։ Գրեթե լիարժեք է համայնքապետի մասին ինֆորմացիան, տեղադրված են համայնքի բյուջեի ծախսերը, համայնքի գույքի տվյալներն ու ավագանու անդամների տվյալների մեծ մասը: