Երթևեկությունը, մասնավորապես, մեծ քաղաքներում գնալով ծանրաբեռնվում է, և ստորգետնյա անցումներից օգտվելը ավելի անվտանգ ու նպատակահարմար է դառնում: Այդ է պատճառը, որ, օրինակ, Գյումրիի քաղաքային իշխանությունները ստորգետնյա նանցումներին սկսել են ուշադրություն հատկացնել։

Գյումրի համայնքում կա 6 գործող անցում։ Դրանցից 2-ը վարձակալությամբ են տրված, բարվոք վիճակում են և շահագործվում են։ Ստորգետնյա 3 անցում նախատեսված էր վերակառուցել Գյումրի համայնքի 2017-2021թթ. հնգամյա զարգացման ծրագրով։ Դրանց վերակառուցումը պետք է ավարտված լիներ 2020 թ.-ին։

Աշխատանքների վերջնաժամկետից անցել է գրեթե մեկ տարի։ Որոշեցինք ստուգել, թե կոնկրետ ո՞ր անցումներն են ընդգրկվել վերակառուցման ծրագրում, որքա՞ն գումար է ծախսել համայնքապետարանը և ինչպե՞ս են վերակառուցվել անցումները։ 2021թ.-ի մայիսի 8-ին, Գյումրիի համայնքապետարան ուղարկեցինք ահա այս հարցումը։

Օրենքով սահմանված ժամկետում, պատասխան չստացանք։ Ավելին, հարցման հետքերով մեր զանգերին քաղաքապետարանը չէր պատասխանում։ Ի վերջո, ուղարկեցինք երկրորդ հարցումը։ Հինգ օրից ստացանք պատասխան, որում նշվում էր, որ մեր առաջին հարցմանը համայնքապետարանը պատասխանել է։ Հետաքրքիրն այն է, որ համայնքապետարանը պատասխանել էր հինգ հարցից միայն մեկին։ Այն էլ՝ մասնակի։

2019թ.-ին, ՎԶԵԲ ֆինանսավորմամբ նորոգվել է 2 ստորգետնյա անցում։ Ինչպես տեսնում եք՝ ոչ մի խոսք այն մասին, թե որքա՞ն գումար է ծախսվել՝ հիշյալ երկու անցումների վերակառուցման համար և կոնկրետ ի՞նչ տեսակի շինաշխատանքներ են այնտեղ կատարվել։ Համայնքի զարգացման ծրագրով նախատեսված երրորդ անցումը 2020թ-ին այդպես էլ չի վերականգնվել։ Իսկ թե ո՞րն է քաղաքապետարանի նշած՝ վերականգնվելիք չորրորդ անցումը, հայտնի չէ։